تحليق منخفض

إيهاب فنان بمقاييس الشعر والرسم والموسيقى والأداء المسرحي

استعانته بالغناء الحي لمقطع من قصيدته مع أدائه على خشبة المسرح جاء أكثر من موفق

جفت سواقي البلد

شعر عامية

تأليف وتصميم وأداء/ ايهاب سمير

غناء/ زينب

ايقاع/ محمد نبيل

جفت سواقى البلد
والارض عطشانه
وهيعمل ايه الولد
والبنت بخلانه

الحلم كامن جوه القلب
محتاج يفضفض بالبراعيم
محتاج يسلم ع العصافير
يرقص باليه مع كل نسيم
محتاج يلملم نور الشمس
ويتمم الصلوات الخمس
ويكونله بكره وبعده وأمس
محتاج كعادة كل يتيم

جفت سواقى البلد
والارض عطشانه
وهيعمل ايه الولد
والبنت بخلانه

انا عينى نامت ع الشبابيك
رجليا ملت كتر اللف
والحلوة رافضة تطل عليك
سيباك فتوب الشوق تتلف
عمال اغنى ياليلى ياعين
ياحلو ياللى فايتنى سنين
وقّفت عمرى عشانك صف
ووقفت أقول على صوت الدف

جفت سواقى البلد
والارض عطشانه
وهيعمل ايه الولد
والبنت بخلانه

بنت الجيران فاتحه الشبابيك
بتلاغى وبتنده لعنيك
عطشان وشرب الميه حلال
هتمد ايدك ف الشلال
تغرف وتشرب وتسافر
بس السفر بالبيت كافر
وانت الحنين جواك قتال
ياتمد ايدك فالشلال
يا تدور وتصبر وتعافر
بس العطش برضك كافر
والغربه صارت هى الحال

جفت سواقى البلد
والارض عطشانه
وهيعمل ايه الولد
والبنت بخلانه